Altsasuko gurasoek eta
Altsasukoak aske plataformako kideek urriaren 26rako epaia salatzeko
manifestazio "erraldoia" deitu dute Iruñean.
Senideek azken
urteotan izandako "elkartasuna eta mobilizazioa" eskatu dute, eta
"manifestazio handia" deitu dute, Iruñeko Justizia Jauregiaren
aurrean, urriaren 26rako, 17:00etarako.
Elkarretaratze
horrekin, goiz horretan bertan Altsasutik irtengo den bizikleta-martxa batek
ere bat egingo du: "Iruñea jendez erabat bete behar dugu", berretsi
dute gurasoek eta Altsasukoak Aske plataformako kideek.
Honezaz gain, azaroan,
gazte batzuk kartzelan sartu zirela hiru urte beteko direla eta, bi
"kontzertu salaketa" antolatzen ari direla esan dute, erakusketa bat
eta auziaren gaineko mahainguru bat.
Baztandik ere bat egin
nahi da manifestazioaren deialdiarekin eta, horrela, autobusa antolatu da, zeina Mendi
tabernatik abiatuko den, arratsaldeko 15.00etan. Izena aldez aurretik tabernan
bertan eman behar da. Baztandarren Biltzarrak antolatu du autobusa.